Кандидат за Градоначалник на Град Скопје
Проф. д-р. Горан Марковски
Манифест: Три чекори за ново Скопје
Скопје денес е град во кој буквално се бориме за живот. Ова веќе не е метафора.
Две депонии горат со недели, воздухот е отровен, а зимата носи нови месеци загадување. Ова лето, цели населби останаа без вода, предупредувајќи дека и најосновниот ресурс станува несигурен.
На улиците, сообраќајот е хаотичен и опасен – луѓе гинат на пешачки премини. Градот тоне во смет, јавниот превоз не функционира, а културната понуда е сведена на увезени настани наместо сопствени идеи.
Во сето тоа, корупцијата постојано наоѓа нови начини да зема животи – од занемарени стандарди до трагедии што можеле да се спречат.
А партиските чиновници, платени од нашите пари, си играат со нашето достоинство – или се недостапни или ненадлежни за секој елементарен проблем, освен кога треба да се среди партиска зделка или коруптивна шема.
Како Независни Заедно, обединети сме околу три вредности:
- Независност – личен интегритет и слобода од партиски притисок
- Стручност – луѓе со знаење и искуство кои знаат да решаваат проблеми
- Визија – поглед напред кон град кој не само што преживува, туку се оди напред и инспирира.
Овие вредности ги преточивме во три јасни чекори, неопходни и остварливи:
Со независност да го сопреме уништувањето на Скопје
Првиот чекор е, со независност, да ја пресечеме силата што го влече градот надолу – да ги стопираме вработувањата и одлучувањата по партиски принцип и со партиски притисок, и преку принцип на независност, стручност и одговорност и да создадеме институции што ќе работат за граѓаните.
Само така ќе ја запреме спиралата на уништување и ќе создадеме простор за вистински почеток.
Со стручност да изградиме здрави темели
Кога уништувањето е сопренo, се отвора пат за обнова.
Вториот чекор е, со стручност, да изградиме стабилен и здрав темел – со независни и компетентни луѓе кои знаат да решат: чистење на депонии, редовно собирање отпад, сигурен јавен превоз, уредени улици и зелени површини.
Тоа е темелот без кој градот не може да оди напред.
Со визија да создадеме град што инспирира
На здравите темели можеме да застанеме и да погледнеме напред.
Третиот чекор е, со визија, да изградиме Скопје кое не само што преживува, туку расте и инспирира – зелен, културно жив град, со сопствени идеи и модерна инфраструктура.
Град во кој ќе сакаме да останеме и на кој ќе бидеме горди.
Го сопираме уништувањето. Градиме здрави темели. Создаваме град со визија.
Тоа е патот на Независни заедно – процес што ќе го претвори Скопје во град на кој сите ќе сакаме да припаѓаме.
Ние веќе зачекоривме. Сега е време и ти да ни се придружиш!